मंडणगड जवळच्या शेनाळे घाटात रविवारी रात्री एक मोठी दुर्घटना थोडक्यात टळली आहे. आंबडवे ते महाड-राजेवाडी महामार्गाचे नूतनीकरणाचे काम सुरू असताना, शेनाळे घाटातील चिंचळी धरणाजवळच्या एका धोकादायक वळणावर चालकाला रस्त्याचा अंदाज न आल्याने भरधाव वेगातील एका कारचा भीषण अपघात झाला.
सुदैवाने, कार रस्त्याच्या बाजूला असलेल्या सिमेंटच्या बॅरिकेड्सवर जोरात आदळली आणि तिथेच थांबली. या अपघातात कारचे मोठे नुकसान झाले असले तरी, ही कार खोल दरीत कोसळता कोसळता वाचल्याने जीवितहानी टळली, ज्यामुळे प्रवाशांनी सुटकेचा निःश्वास सोडला.
सदर अपघात रात्री उशिरा घडला.
मिळालेल्या माहितीनुसार, चालकाला चिंचळी धरणाजवळील मोठ्या वळणाचा अंदाज आला नाही. हा वळणमार्ग महामार्ग प्राधिकरणाने रुंद न केल्यामुळे अत्यंत धोकादायक बनला आहे. याच धोकादायक वळणावर ही कार थेट बॅरिकेड्सवर जाऊन धडकली. जर हे बॅरिकेड्स नसते, तर कार थेट खोल दरीत कोसळून मोठी जीवितहानी होण्याची शक्यता होती.
स्थानिक नागरिकांनी या धोकादायक वळणाबाबत महामार्ग प्राधिकरणाला वेळोवेळी सूचना देऊनही कोणतीही सुधारणा करण्यात आलेली नाही. सध्या हे वळण दुहेरी वाहतुकीसाठी अत्यंत अयोग्य बनले आहे. या अपघातामुळे पुन्हा एकदा रस्त्याच्या कामातील त्रुटी आणि वळणाचे धोके समोर आले आहेत.
या गंभीर घटनेनंतर, नागरिकांनी महामार्ग प्राधिकरणाकडे तातडीने या वळणावर कायमस्वरूपी सुरक्षित उपाययोजना करण्याची आणि रस्त्याच्या कामातील चुका सुधारण्याची जोरदार मागणी केली आहे. या मागणीकडे दुर्लक्ष झाल्यास भविष्यात या भागात आणखी मोठे अपघात होण्याची भीती व्यक्त होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
