दापोली ते खेड महामार्गावर करमरकर शोरूमच्या शेजारील हिल टॉप परिसरात असलेल्या भंगार डेपोच्या कडेला मोठ्या प्रमाणावर प्लास्टिक कचरा उघड्यावर टाकण्यात आल्याची धक्कादायक बाब समोर आली आहे. रस्त्यालगत साचलेला हा प्लास्टिक कचरा परिसरातील गुरे खात असल्याचे दृश्य नागरिकांच्या निदर्शनास आले असून त्यामुळे जनावरांच्या आरोग्याला गंभीर धोका निर्माण झाला आहे.
स्थानिकांच्या म्हणण्यानुसार, संबंधित ठिकाणी दीर्घकाळापासून प्लास्टिक पिशव्या, पॅकेजिंग साहित्य व इतर अविघटनशील कचरा साचत आहे. योग्य विल्हेवाट न लावता उघड्यावर टाकण्यात येणाऱ्या या कचऱ्यामुळे परिसर अस्वच्छ झाला असून दुर्गंधीही पसरत आहे. विशेष म्हणजे, रस्त्याच्या अगदी कडेला कचऱ्याचे ढिगारे असल्याने गुरे अन्नाच्या शोधात तेथे येतात आणि प्लास्टिक खातात. पशुवैद्यकीय तज्ज्ञांच्या मते, प्लास्टिक पोटात साचल्यास जनावरांना पचनासंबंधी गंभीर आजार होऊ शकतात आणि काही प्रकरणांत मृत्यूही ओढवू शकतो.
महामार्गालगत गुरांची वर्दळ वाढल्यास अपघाताचा धोका देखील संभवतो. वाहनचालकांना अचानक रस्त्यावर येणाऱ्या जनावरांमुळे धोका निर्माण होऊ शकतो. त्यामुळे ही बाब केवळ पर्यावरणीयच नव्हे तर सार्वजनिक सुरक्षिततेचाही प्रश्न बनली आहे.
स्थानिक नागरिकांनी प्रशासनाने तातडीने या प्रकाराची दखल घेऊन संबंधितांवर कारवाई करावी, कचऱ्याची त्वरित विल्हेवाट लावावी आणि भविष्यात अशा प्रकारांना आळा घालण्यासाठी ठोस उपाययोजना कराव्यात, अशी मागणी केली आहे. तसेच परिसरात नियमित स्वच्छता मोहीम राबवून कचरा व्यवस्थापनाची काटेकोर अंमलबजावणी करण्याची गरज व्यक्त करण्यात येत आहे.
या प्रकरणी संबंधित विभागाने तातडीने पाहणी करून जनावरांचे व पर्यावरणाचे रक्षण करण्यासाठी ठोस पावले उचलावीत, अशी अपेक्षा व्यक्त होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
