महाराष्ट्र राज्य माध्यमिक व उच्च माध्यमिक शिक्षण मंडळाच्या वतीने घेण्यात येणारी माध्यमिक शालान्त प्रमाणपत्र (इ. 10 वी) परीक्षा आज शुक्रवार, 20 फेब्रुवारी पासून सुरू होत आहे. कोकण विभागीय मंडळांतर्गत येणाऱ्या रत्नागिरी आणि सिंधुदुर्ग जिल्ह्यातील एकूण 25,777 विद्यार्थ्यांनी या परीक्षेसाठी नोंदणी केली आहे. 18 मार्च 2026 पर्यंत ही परीक्षा चालणार आहे. विद्यार्थ्यांना परिक्षा केंद्रावर जाण्यासाठी एस.टी. बसेसचे नियोजन आणि केंद्रांवर अखंडित वीज पुरवठा ठेवण्याबाबत संबंधित विभागांना कळवण्यात आले आहे.
ही परिक्षा सकाळच्या सत्रात 10:30 वा आणि दुपारच्या सत्रात 2:30 वाजता होणार आहे. त्यामुळे वेळेत विद्यार्थ्यांनी परीक्षा दालनात उपस्थित राहणे अनिवार्य आहे. सर्व परीक्षार्थ्यांना परिक्षेच्या निर्धारित वेळेपूर्वी किमान अर्धा तास अगोदर परीक्षा केंद्रांवर पोहचण्याच्या सूचना शाळांमार्फत देण्यात आल्या आहेत. गतवर्षी प्रमाणा विद्यार्थ्यांचे हित लक्षात घेऊन निर्धारित वेळेनंतर 10 मिनिटे वाढीव वेळ देण्यात आली आहे.
कोकण बोर्डाच्या अख्यत्यारित रत्नागिरीत एकूण 413 शाळांसाठी 73 केंद्र आणि सिंधुदुर्ग मध्ये 228 शाळांसाठी एकूण 41 केंद्रे अशी मिळून या दोन्ही जिल्हय़ात एकूण 114 केंद्रांवर ही परिक्षा होणार आहे. त्यासाठी दोन्ही जिल्हय़ात एकूण 22 परिरक्षक नियुक्त करण्यात आले आहेत. रत्नागिरी जिल्ह्य़ात 17 हजार 450 विद्यार्थी आणि सिंधुदुर्ग जिल्ह्य़ात 8 हजार 327 विद्यार्थी ही परिक्षा देणार आहेत.
चालू वर्षी जिल्हाधिकाऱ्यांच्या अध्यक्षतेखाली जिल्हा दक्षता समित्या अधिक सक्रियपणे काम करत आहेत. सीसीटिव्हीमुळे गैरप्रकारांना पूर्णतः प्रतिबंध घालण्यात आला आहे. गैरप्रकार करणारे, त्यांना मदत करणारे आणि उत्तेजन देणारे यांच्या विरुद्ध अजामीनपात्र व दखलपात्र गुन्हे नोंद करण्याया सूचना देण्यात आल्या असल्याचे कोल्हापूर व कोकण विभागीय मंडळ विभागीय अध्यक्ष राजेश क्षीरसागर यांनी सांगितले आहे.
या परिक्षेसाठी कॉपीमुक्त अभियान राबवताना परीक्षा केंद्राच्या 500 मीटर परिसरात झेरॉक्स सेंटर बंद राहतील आणि कलम 144 (जमावबंदी) लागू करण्यात आले आहे. गैरप्रकारांना आळा घालण्यासाठी विभागीय मंडळाने विशेष भरारी पथके नेमली आहेत. जिल्हाधिकारी व मुख्य कार्यकारी अधिकारी केंद्रांना भेटी देणार आहेत. ज्या 4 केंद्रांवर सीसीटीव्ही नाहीत, तिथे बाहेरील शाळांतील शिक्षकांची पर्यवेक्षक म्हणून नियुक्ती करण्यात आली आहे.
विद्यार्थ्यांसाठी विशेष समुपदेशन व हेल्पलाईन परीक्षेचा ताण घालवण्यासाठी समुपदेशकांची नियुक्ती केली असून 02352-231250आणि 02352-228480 या हेल्पलाईन क्रमांकावर संपर्क साधता येईल. उत्तरपत्रिकांचे अचूक लेखन कसे करावे, यासाठी विषयतज्ञांचे व्हिडिओ कोल्हापूर विभागीय मंडळाच्या चॅनेलवर उपलब्ध करून देण्यात आले आहेत. कोणत्याही अफवांना किंवा चुकीच्या वेळापत्रकाला बळी पडू नका. मंडळाने अधिकृतरीत्या प्रसिद्ध केलेले वेळापत्रकच ग्राह्य धरावे.
– पुनिता गुरव, विभागीय सचिव, कोकण विभागीय मंडळ.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
