रत्नागिरी जिल्ह्यातील खेड तालुक्यात आज (दि. ११ नोव्हेंबर) सकाळी एक दुर्दैवी घटना उघडकीस आली आहे. खेड–बहिरवली मार्गावरील नांदगाव परिसरात रस्त्याच्या कडेला एक बिबट्या मृतावस्थेत आढळून आला आहे. या घटनेमुळे परिसरात एकच खळबळ उडाली असून स्थानिक नागरिकांमध्ये वन्यजीवांच्या सुरक्षिततेबाबत चिंता निर्माण झाली आहे.
स्थानिक ग्रामस्थांनी हा मृत बिबट्या पाहताच वनविभागाला याची माहिती दिली. वनविभागाचे अधिकारी आणि कर्मचारी घटनास्थळी धाव घेऊन पंचनामा केला. प्राथमिक तपासानुसार, अज्ञात वाहनाने धडक दिल्याने या बिबट्याचा मृत्यू झाला असावा, असा अंदाज वनविभागाने व्यक्त केला आहे. वनाधिकारी उमेश भागवत यांनी सांगितले की, “बिबट्याच्या डोक्याला गंभीर दुखापत झालेली आहे.
या गंभीर जखमेमुळे त्याचा जागीच मृत्यू झाला असावा. शवविच्छेदनानंतर नेमकं कारण स्पष्ट होईल.” वनविभागाने मृत बिबट्याचा मृतदेह सुरक्षितरीत्या ताब्यात घेतला असून, आवश्यक तपास व अहवालाची प्रक्रिया सुरू आहे. खेड–बहिरवली मार्ग हा हिरवळ आणि जंगलाने वेढलेला आहे. त्यामुळे या रस्त्यावर अनेकदा वन्य प्राणी, विशेषतः बिबटे, सांबर आणि रानडुक्कर रस्ता ओलांडताना दिसतात. मात्र, वेगाने धावणाऱ्या वाहनांमुळे अपघात घडतात आणि प्राण्यांचे जीव जातात.
वनविभागाने नागरिकांना आवाहन केले आहे की, “जंगलातून जाताना वेग कमी ठेवा, हॉर्न वाजवू नका आणि रात्री गाडीचा प्रकाश कमी ठेवा.” अज्ञात वाहनचालकाविरोधात वन्यजीव संरक्षण कायद्यानुसार गुन्हा दाखल करण्याची प्रक्रिया सुरू आहे. वाहनचालकाने अपघातानंतर घटनास्थळावर थांबण्याऐवजी पलायन केल्याचा संशय व्यक्त करण्यात आला आहे. त्यामुळे सीसीटीव्ही फुटेज आणि स्थानिक साक्षीदारांच्या मदतीने आरोपीचा शोध घेतला जात आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
