खेड–दापोली राज्य महामार्ग क्रमांक 162 वर सुरू असलेल्या रस्ते सुधारणा कामामुळे वाहनचालकांसाठी महत्त्वाचा वाहतूक बदल जाहीर करण्यात आला आहे. सार्वजनिक बांधकाम विभाग, चिपळूण यांच्या देखरेखीखाली ‘हॅम’ (HAM) योजनेअंतर्गत हे काम प्रगतीपथावर असून, साखळी क्रमांक 0/300 येथे स्लॅब ड्रेन व पुलाच्या पुनर्रचनेचे काम हाती घेण्यात येणार आहे.
सदर कामासाठी सध्या उपलब्ध असलेली 12 मीटर रस्त्याची रुंदी अपुरी पडत असल्याने, काम सुरक्षित व वेळेत पूर्ण व्हावे यासाठी प्रशासनाने पर्यायी मार्गाने वाहतूक वळविण्याचा निर्णय घेतला आहे. यासंदर्भात अपर जिल्हादंडाधिकारी चंद्रकांत सूर्यवंशी यांनी मोटार वाहन कायदा 1988 च्या कलम 115 अन्वये आदेश जारी केले आहेत.
पर्यायी मार्गाची माहिती
दापोली–खेड या मार्गावरील सर्व वाहतूक पुढील तीन महिन्यांसाठी वळविण्यात येणार आहे. सध्याचा थेट राज्य मार्ग 162 ऐवजी आता दापोली–खेडडर्डी–पिसई–पालगड फाटा मार्गे राज्य मार्ग 101 वरून खेड असा पर्यायी मार्ग वापरावा लागणार आहे.
या बदलामुळे प्रवासाचे अंतर सुमारे 30 किमीवरून 38 किमीपर्यंत वाढणार असून, वाहनचालकांना अतिरिक्त 8 किमीचा प्रवास करावा लागणार आहे.
अवजड वाहनांसाठी स्वतंत्र मार्ग
मंडणगड तालुक्यातील बॉक्साईट खाणींमधून येणाऱ्या अवजड वाहनांमुळे खेड शहरात मोठ्या प्रमाणात वाहतूक कोंडी होत असल्याने, या वाहनांसाठी स्वतंत्र वळण मार्ग निश्चित करण्यात आला आहे.
पूर्वी ही वाहने दस्तुरी फाटा मार्गे खेड शहरातून भरणा नाक्याकडे जात होती. आता मात्र मंडणगड–विसापूर फाटा–राज्य मार्ग 97 (लाटवण–रेवतळे)–राज्य मार्ग 172 (नातुनगर–तुळशी–विन्हेरे–भोगाव)–राष्ट्रीय महामार्ग 66 (मुंबई–गोवा) असा पर्यायी मार्ग निश्चित करण्यात आला आहे.
या बदलामुळे अवजड वाहनांच्या प्रवासात सुमारे 20 किमीची वाढ होऊन एकूण अंतर 50 किमीवरून 70 किमीपर्यंत जाणार आहे.
वळविण्यात आलेल्या मार्गावर ठेकेदारामार्फत आवश्यक दिशादर्शक फलक, बॅरिकेडिंग तसेच सुरक्षा रक्षकांची नेमणूक करण्यात येणार आहे. याशिवाय, वाहतूक नियंत्रणासाठी पोलीस विभागाकडूनही आवश्यक ती चिन्हे उभारण्याच्या सूचना देण्यात आल्या आहेत.
वाहतूक कोंडी टाळण्यासाठी तसेच कोणताही अनुचित प्रकार घडू नये यासाठी वाहनचालकांनी पर्यायी मार्गांचा वापर करावा आणि प्रशासनाला सहकार्य करावे, असे आवाहन करण्यात आले आहे.
पुढील तीन महिन्यांच्या कालावधीत या बदलांची अंमलबजावणी राहणार असल्याने, प्रवासाचे नियोजन करताना वाहनचालकांनी अतिरिक्त वेळ गृहीत धरावा.
एकूणच, रस्ते सुधारणा आणि पुलाच्या कामामुळे हा बदल तात्पुरता असला तरी, भविष्यात अधिक सुरक्षित आणि सुसज्ज मार्ग उपलब्ध होण्यासाठी हे काम महत्त्वाचे ठरणार आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
