दापोली तालुक्यातील जालगाव बाजारपेठ परिसरात शनिवारी सकाळी घरगुती वादाने गंभीर वळण घेत एका महिलेवर सुरीने हल्ला झाल्याची धक्कादायक घटना घडली. नम्रता भाटकर यांना त्यांच्या नात्यातील तिघांकडून मारहाण करून गंभीर जखमी करण्यात आल्याची फिर्याद दापोली पोलीस ठाण्यात दाखल झाली आहे.
मिळालेल्या माहितीनुसार, शनिवारी सकाळी साडेआठच्या सुमारास नम्रता भाटकर घराच्या अंगणात स्वच्छता करत असताना कचरा टाकण्यावरून त्यांची जाऊ विनिता भाटकर यांच्यासोबत वाद झाला. हा वाद अल्पावधीतच वाढत पती विनोद भाटकर यांच्यापर्यंत पोहोचला. संतापलेल्या विनोद यांनी नम्रताला शिवीगाळ करून मारहाण केल्याचा आरोप फिर्यादीत नमूद आहे.
वाद वाढत असताना नम्रताचे दीर विलास भाटकर घटनास्थळी आले. पोलिसांनी दिलेल्या माहितीनुसार, विलास यांनी शिवीगाळ करत स्वयंपाकघरातील भाजी चिरायची सुरी वापरून नम्रताच्या उजव्या हातावर आणि मनगटावर वार केले. या हल्ल्यात नम्रता जखमी झाल्या आहेत.
नम्रतांनी दिलेल्या फिर्यादीनुसार विनोद भाटकर, विलास भाटकर आणि विनिता भाटकर (रा. जालगाव बाजारपेठ) या तिघांविरोधात भारतीय न्याय संहिता अधिनियम 2023 अंतर्गत कलम 118(1), 115(2), 352, 3(5) नुसार गुन्हा दाखल करण्यात आला आहे.
दापोली पोलिसांकडून पुढील तपास सुरू असून आरोपींच्या भूमिकेबाबत अधिक चौकशी केली जात आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
