मंडणगड तालुक्यातील वेसवी-शिपोळे येथील ‘इनामदार पब्लिक इंग्लिश स्कूल’च्या आवारात बेकायदेशीर प्रवेश करून शाळेचे नुकसान केल्याची आणि शिक्षक-विद्यार्थ्यांना धमकावल्याची धक्कादायक घटना समोर आली आहे. याप्रकरणी पुणे येथील रहिवासी आणि संस्थेचे चालक शफी यासीन इनामदार यांनी दिलेल्या फिर्यादीवरून मंडणगड पोलिसांनी एका संशयिताविरुद्ध गुन्हा दाखल केला आहे.
मिळालेल्या माहितीनुसार,
संशयित जमान सईद लांबे (वय ४५, रा. शिपोळे बंदर) याने २२ फेब्रुवारी रोजी सकाळी ९ वाजल्यापासून ते २३ फेब्रुवारीच्या सकाळपर्यंत वारंवार शाळेच्या इमारतीत आणि आवारात बेकायदेशीरपणे प्रवेश केला. शाळेचे प्रशासन किंवा शिक्षकांची कोणतीही परवानगी न घेता आरोपीने शाळेच्या कामात अडथळा निर्माण केला.
आरोपीने खोडसाळपणा करत शाळेचा जिना आणि इमारतीच्या मुख्य दरवाजाला हिरव्या रंगाचा नेटचा कपडा बांधला. यामुळे विद्यार्थ्यांना आणि शिक्षकांना येण्या-जाण्यास मोठा अडथळा निर्माण झाला. एवढ्यावरच न थांबता, संशयिताने शाळेतील विद्यार्थ्यांच्या पाणी पिण्याच्या नळांची आणि पाईपची तोडफोड केली. या तोडफोडीत शाळेचे सुमारे २,५०० रुपयांचे नुकसान झाले आहे.
शाळेत प्रवेश केल्यानंतर संशयिताने तेथील शिक्षक आणि कर्मचाऱ्यांना उद्धटपणे बोलून दमदाटी केल्याचा आरोपही फिर्यादीत करण्यात आला आहे.
यामुळे शाळेतील मुलांमध्ये आणि कर्मचाऱ्यांमध्ये भीतीचे वातावरण पसरले होते.
संस्थेचे चालक शफी इनामदार (वय ६७, रा. हडपसर, पुणे) यांनी २३ फेब्रुवारी रोजी सायंकाळी ६ वाजता मंडणगड पोलीस ठाण्यात रीतसर तक्रार दिली. या तक्रारीवरून पोलिसांनी आरोपी जमान लांबे याच्यावर भारतीय न्यायसंहिता २०२३ च्या कलम ३२९(३), ३२४(२), ३५१(२) आणि १२६(२) अन्वये गुन्हा दाखल केला आहे. मंडणगड पोलीस या प्रकरणाचा अधिक तपास करत असून, शैक्षणिक संस्थेत अशा प्रकारे घुसखोरी करून तोडफोड केल्याने परिसरात संताप व्यक्त केला जात आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
