राजापूर तालुक्यातील सौंदळ भालेकरवाडी येथे कौटुंबिक वाद धक्कादायक हिंसाचारात रूपांतरित झाला. या घटनेत सख्ख्या काकाने आपल्या पुतण्यावर कुऱ्हाडीने प्रहार केला असून, जखमी पुतण्याची प्रकृती गंभीर आहे.
मिळालेल्या माहितीनुसार, ही घटना ४ एप्रिल रोजी रात्री सुमारे ८ वाजता घडली. घरगुती वादाच्या पार्श्वभूमीवर तुकाराम गोपाळ चव्हाण हे आपल्या पत्नी व मुलासह घरात असताना वाद सुरू झाला. या वादामध्ये त्यांचा भाऊ आणि संशयित आरोपी दशरथ गोपाळ चव्हाण याने हस्तक्षेप केला आणि जुन्या कौटुंबिक वादांचा उल्लेख करत वाद अधिक चिढवला.
यावेळी, फिर्यादीचा मुलगा नरेंद्र चव्हाण वाद सोडवण्यासाठी हस्तक्षेप करत विचारणा केली असता, संतापलेल्या दशरथने हातातील बॅटरीने त्याच्या डोक्यावर मारहाण केली आणि शिवीगाळ करत आपल्या घराकडे निघून गेला.
यानंतर, नरेंद्रने ‘तू शिवीगाळ का करतोस?’ असा प्रश्न विचारण्यासाठी दशरथच्या घराच्या अंगणात प्रवेश केला. या वेळी, संतापलेल्या दशरथने तिथे पडलेली लाकडी दांड्याची लोखंडी कुऱ्हाड उचलून नरेंद्रच्या डोक्यावर प्रहार केला. या गंभीर हल्ल्यात ३२ वर्षीय नरेंद्र चव्हाण गंभीर जखमी झाला.
तुकाराम चव्हाण यांनी ५ एप्रिल रोजी पहाटे राजापूर पोलिस ठाण्यात तक्रार दाखल केली. पोलिसांनी या प्रकरणाची दखल घेत आरोपी दशरथ चव्हाण याच्याविरुद्ध भारतीय न्याय संहिता २०२३ च्या कलम ११८(१), ३५२, ३५१(१) आणि ३५१(२) नुसार गुन्हा नोंदवला असून, पुढील तपास सुरू आहे.
या घटनेने स्थानिक परिसरात भीतीचे वातावरण निर्माण झाले असून, पोलिसांनी नागरिकांना शिस्तीचे पालन करण्याचे आवाहन केले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
