मंडणगड तालुक्यातील गोठे गावात क्षुल्लक कारणावरून झालेल्या वादाने भीषण रूप धारण करत एका कुटुंबावर थेट घरात घुसून प्राणघातक हल्ला केल्याची गंभीर घटना घडली आहे. या घटनेमुळे संपूर्ण परिसरात भीतीचे वातावरण निर्माण झाले असून, कायदा-सुव्यवस्थेचा प्रश्नही ऐरणीवर आला आहे.
मिळालेल्या माहितीनुसार, प्रराज शांताराम जाधव (वय ३९) हे नालासोपारा येथे वास्तव्यास असून, ते काही दिवसांसाठी आपल्या मूळ गावी गोठे (ता. मंडणगड) येथे आले होते. बुधवार, दिनांक ८ एप्रिल रोजी दुपारी सुमारे १२:३० वाजण्याच्या सुमारास ही धक्कादायक घटना घडली.
गावातील पाखाडी (रस्ता) वापरण्यावरून जाधव आणि आरोपी यांच्यात पूर्वी किरकोळ वाद झाला होता. याच वादाचा राग मनात धरून आरोपी विकास गमरे, त्यांचा मुलगा सुनील गमरे आणि रौनक मर्चेडे यांनी संतापाच्या भरात थेट जाधव यांच्या घरात घुसून हल्ला चढवला.
आरोपींनी लोखंडी चौकोनी पाईप आणि लाकडी काठ्यांचा वापर करत प्रराज जाधव यांना पाठीवर, हातांवर व पायांवर बेदम मारहाण केली. अचानक झालेल्या या हल्ल्यामुळे जाधव गंभीर जखमी झाले. हल्ल्यावेळी आरोपींनी शिवीगाळ करत जीवे मारण्याच्या धमक्या दिल्याचीही माहिती समोर आली आहे.
या गोंधळात हस्तक्षेप करून वाद मिटवण्याचा प्रयत्न करणाऱ्या जाधव यांच्या बहिणी शुक्रांती शांताराम जाधव (वय ४२) यांनाही आरोपींच्या संतापाचा फटका बसला. आरोपी सुनील गमरे याने लोखंडी पाईपने त्यांच्या डोक्यावर जोरदार वार केला. या वारामुळे त्यांच्या डोळ्याच्या भुवईजवळ गंभीर जखम झाली असून, त्यांची प्रकृती चिंताजनक असल्याचे सांगितले जात आहे.
इतकेच नव्हे, तर घरातील वृद्ध आईलाही आरोपींनी ढकलून दिल्याने त्या देखील जखमी झाल्या आहेत. घरात घुसून महिलांवर आणि वृद्धांवरही हल्ला केल्यामुळे या घटनेची गंभीरता अधिक वाढली आहे.
या प्रकरणी प्रराज जाधव यांच्या तक्रारीवरून मंडणगड पोलीस ठाण्यात विकास गणपत गमरे (वय ५२), सुनील विकास गमरे (वय २३) आणि रौनक राजन मर्चेडे (वय २२) या तिघांविरुद्ध भारतीय न्याय संहिता २०२३ अंतर्गत कलम ११८(१), ११५(२), ३३३, ३५२, ३५१(२) आणि ३(५) अन्वये गुन्हा दाखल करण्यात आला आहे.
घटनेची अधिकृत नोंद ८ एप्रिल रोजी रात्री ८ वाजण्याच्या सुमारास करण्यात आली असून, पोलिसांकडून आरोपींचा शोध आणि पुढील तपास सुरू आहे.
रस्त्याच्या वापरासारख्या छोट्याशा कारणावरून एवढा गंभीर आणि हिंसक प्रकार घडल्याने गावकऱ्यांमध्ये संताप व्यक्त केला जात आहे. अशा घटनांमुळे समाजातील तणाव वाढत असून, वेळेवर मध्यस्थी आणि संयम राखणे किती गरजेचे आहे, हे पुन्हा अधोरेखित झाले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
