मुंबई–गोवा महामार्ग वरील तळेकांटे (ता. संगमेश्वर) येथे ३ एप्रिल २०२६ रोजी सायंकाळी सुमारे ७.१५ वाजण्याच्या सुमारास काळजाचा थरकाप उडवणारा भीषण अपघात घडला. या अपघातात मंडणगड येथील ६६ वर्षीय प्रतिष्ठित व्यापारी दत्तात्रय केशव लेंडे गंभीर जखमी झाले असून त्यांच्यावर उपचार सुरू आहेत.
संगमेश्वर पोलिसांकडून मिळालेल्या माहितीनुसार, दत्तात्रय लेंडे हे त्यांच्या Maruti Suzuki Alto K10 (क्र. एमएच ०८ एयू ५१००) या कारने रत्नागिरीच्या दिशेने प्रवास करत होते. तळेकांटे गावाच्या हद्दीत ते पोहोचले असता, समोरून येणाऱ्या Tata Truck (क्र. केए २२ एए २९४७) ने भरधाव वेगात त्यांच्या कारला चालकाच्या बाजूने जोरदार धडक दिली.
धडक इतकी जबरदस्त होती की, लेंडे यांची कार रस्त्यावरून उडून थेट डायव्हर्जनच्या पलीकडे जाऊन फेकली गेली. अपघाताचा आवाज दूरवर ऐकू गेला आणि काही क्षणांतच परिसरात नागरिकांची गर्दी जमली. कारचा समोरील भाग पूर्णपणे चिरडला गेला असून वाहनाचा अक्षरशः चक्काचूर झाला आहे.
अपघातानंतर स्थानिकांनी तत्काळ धाव घेत जखमी लेंडे यांना बाहेर काढले आणि उपचारासाठी रुग्णालयात हलवले. या भीषण धडकेत लेंडे गंभीर जखमी झाले असून त्यांची प्रकृती चिंताजनक असल्याची माहिती समोर येत आहे. एका क्षणात घडलेल्या या दुर्घटनेमुळे लेंडे कुटुंबावर चिंतेचे सावट पसरले आहे.
या प्रकरणी जखमींचे सुपुत्र दिनेश दत्तात्रय लेंडे यांनी संगमेश्वर पोलीस ठाणे येथे धाव घेत तक्रार दाखल केली. पोलिसांनी घटनेची गांभीर्याने दखल घेत ४ एप्रिल २०२६ रोजी दुपारी १.२८ वाजता संबंधित ट्रक चालक हनुमंत लक्ष्मण हल्ली (रा. बेळगाव) याच्याविरुद्ध गुन्हा नोंदवला आहे.
या घटनेची नोंद पोलीस हेड कॉन्स्टेबल के. आर. सावंत यांनी केली असून, पुढील तपास पोलीस हेड कॉन्स्टेबल एस. एस. जाधव करत आहेत. प्राथमिक तपासात ट्रक चालकाचा बेदरकार वेग आणि निष्काळजीपणा अपघातास कारणीभूत ठरल्याचा संशय व्यक्त केला जात आहे.
दरम्यान, या अपघातामुळे काही काळ वाहतूक विस्कळीत झाली होती. दोन्ही वाहनांचे मोठे नुकसान झाले असून महामार्गावरील सुरक्षेचा प्रश्न पुन्हा एकदा ऐरणीवर आला आहे. स्थानिकांकडून या मार्गावर वेगमर्यादा काटेकोरपणे अंमलात आणावी, तसेच धोकादायक ठिकाणी योग्य ती उपाययोजना करावी, अशी मागणी करण्यात येत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
