देवरूख तालुक्यातील आंबा घाट परिसरात घडलेल्या लुटीच्या घटनेने संपूर्ण संगमेश्वर तालुक्यात खळबळ उडाली आहे. बुधवारी रात्री ही घटना घडली असून, एका बोलेरो वाहनातून म्हैस घेऊन जाणाऱ्या चालकाला अडवून त्याच्याकडील रोख रक्कम लुटण्यात आली.
मिळालेल्या माहितीनुसार, चालक आंबा घाटमार्गे बांबावडेच्या दिशेने जात असताना दख्खन परिसरात अचानक ८ जणांनी त्याचा रस्ता अडवला. आरोपींनी चालकाला धमकावून त्याच्याकडील सुमारे २५ हजार रुपये हिसकावून घेतले आणि घटनास्थळावरून पसार झाले. या घटनेमुळे परिसरात भीतीचे वातावरण निर्माण झाले आहे. घटनेची माहिती मिळताच देवरूख पोलिसांनी तात्काळ घटनास्थळी धाव घेतली. लांजा उपविभागीय पोलीस अधिकारी सुरेश कदम यांच्या मार्गदर्शनाखाली पोलीस निरीक्षक उदय झावरे यांनी पथकासह तपास सुरू केला.
साखरपा पोलीस दूरक्षेत्राचे सहाय्यक पोलीस उपनिरीक्षक शांताराम पंदेरे, तसेच पोलीस कर्मचारी सचिन कामेरकर आणि प्रशांत साळुंखे यांनीही तपासात सक्रिय सहभाग घेतला.
पोलीसांनी वेगाने हालचाल करत संशयितांचा माग काढला आणि अवघ्या काही तासांत ५ जणांना ताब्यात घेण्यात यश मिळवले. या आरोपींकडून अधिक चौकशी सुरू असून लुटीमागील नेमका हेतू आणि इतर संबंधित माहिती उघड होण्याची शक्यता आहे.
दरम्यान, या प्रकरणातील अजून ३ आरोपी फरार असून त्यांचा शोध घेण्यासाठी पोलीसांनी विशेष पथके तयार केली आहेत. फरार आरोपींना लवकरच अटक करण्यात येईल, असा विश्वास पोलिसांनी व्यक्त केला आहे.
घटनेनंतर उपविभागीय पोलीस अधिकारी सुरेश कदम यांनी स्वतः घटनास्थळी भेट देऊन तपासाचा आढावा घेतला. या प्रकरणाचा लवकरच पूर्ण उलगडा होईल, असेही त्यांनी सांगितले.
एकूणच, पोलिसांनी दाखवलेल्या तत्परतेमुळे मोठ्या गुन्ह्याचा काही अंशी छडा लावण्यात यश आले असले तरी उर्वरित आरोपींच्या अटकेकडे आता सर्वांचे लक्ष लागले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
