“तारीख पे तारीख…”, देणाऱ्या TWJ ची तारीख निघाली, कोट्यवधींचा गंडा, समीर नार्वेकरवर गुन्हा दाखल, 4 टक्के व्याजाचे आमिष दाखवून फसवलं

‘ट्रेड विथ जॅझ असोसिएट प्रा.लि. (TWJ)’ या पुणे स्थित कंपनीने ‘फ्रेंचायझी बिझनेस अॅग्रीमेंट’च्या नावाखाली अधिक परताव्याचे आमिष दाखवून राज्यभरातील अनेक गुंतवणूकदारांची कोट्यवधी रुपयांची फसवणूक केल्याचे समोर आले आहे.

यवतमाळ शहरातील चौघा गुंतवणूकदारांची तब्बल ३९ लाख रुपयांनी फसवणूक झाल्याची तक्रार दाखल झाल्यानंतर, या कंपनीने एकूण ३ कोटी ३१ लाख रुपयांचा गंडा घातल्याचे उघड झाले आहे. या घटनेमुळे राज्यभरातील गुंतवणूकदारांमध्ये खळबळ उडाली असून, त्यांच्या पायाखालची जमीनच सरकली आहे.

याप्रकरणी, गजेंद्र श्रावण गणवीर (वय ५५, रा. अंबिकानगर, यवतमाळ) यांनी अवधूतवाडी पोलिस ठाण्यात तक्रार दाखल केली आहे. पोलिसांनी कंपनीचे व्यवस्थापकीय संचालक (MD) समीर नार्वेकर (वय ४०, रा. पुणे), संचालक नेहा समीर नार्वेकर (वय ३८, रा. पुणे), विभागीय व्यवस्थापक सागर मंचलवार (वय ३८, रा. संभाजीनगर, यवतमाळ), शाखा व्यवस्थापक सूरज मडगुलवार (वय ३७, रा. यवतमाळ), आणि लेखापाल नम्रता सूरज मडगुलवार (वय ३५, रा. यवतमाळ) यांच्याविरोधात गुन्हा दाखल केला आहे.

२०१९ पासून गुंतवणुकीतून स्वीकारून हुकमी व आकर्षक परताव्याचा दावा करणाऱ्या TWJ Pvt Ltd या कंपनीने गेले ८ महिने लोकांना परतावा व त्यांच्या गुंतवणुकीच्या मुळ रक्कम थकवली होती, यासंबंधी कंपनीची सिंगापूर मधील गुंतवणुक येणार असून पैसे त्वरित देणार अशी बतावणी करीत गेले TWJ चा संचालक समीर नार्वेकर हा ८ महिने खोट्या आशेवर ठेवले होते, अनेक तारखा देऊन ही गुंतवणूक परत न मिळाल्या मुळे शेवटी गुंतवणूकदारांचा संयमाचा बांध फुटला.

सदर गुंतवणुकीत अनेक उच्चपदस्थ शासकीय अधिकारी व २३०० पेक्षा जास्त पोलिसांची गुंतवणूक असल्याबाबत
स्वतः समीर नार्वेकर अनेकवेळा सांगत असे, बहुदा त्यामुळेच अशा दखलपात्र गुन्ह्या बाबत देखिल राज्यातील विविध भागात पोलीस गुन्हे दाखल करीत नव्हते. रत्नागिरी जिल्ह्यातील चिपळूण व रत्नागिरी शहर येथे दाखल तक्रारींवर तर साधी चौकशी देखिल झाली नव्हती.

TWJ कंपनीच्या राज्यभर असलेल्या १६ शाखांच्या भागात सर्व संचालक, ब्रांच मॅनेजर व कंपनीचे बिझनेस पार्टनर्स यांच्यावर गुन्हे दाखल करण्याबाबत आवाहन पोलिसांमार्फत केले जाईल.

कंपनीने गुंतवणूकदारांना दरमहा ३ ते ४ टक्के व्याज देण्याचे आमिष दाखवले होते. ‘ट्रेड विथ जॅझ’ची राज्यात तब्बल १६ शाखा असल्याचे सांगण्यात आले. कंपनी शेअर मार्केटमध्ये गुंतवणुकीचे प्रशिक्षण देते, असेही भासवण्यात आले. त्यांनी ‘TWJ इव्हेंट’, ‘TWJ इनका’, ‘TWJ हॉस्पिटॅलिटी’, ‘TWJ लर्निंग’ आणि ‘TWJ लॉजिस्टिक’ अशा विविध उपकंपन्या असल्याचा दावा केला. या उपकंपन्यांमध्ये गुंतवणूक करून मोठा नफा कमावण्याचे स्वप्न दाखवण्यात आले.

तक्रारदार गजेंद्र गणवीर यांच्या जावई ओमप्रकाश खांडेकर, रा. अमरावती यांनी या कंपनीत १० लाख रुपये गुंतवल्यानंतर, गणवीर यांनी जानेवारी २०२४ ते सप्टेंबर २०२५ या कालावधीत १४ लाख रुपयांची गुंतवणूक केली. त्यांच्यासोबतच त्यांचे लहान भाऊ सदानंद यांनी ५ लाख, तर वीरेंद्रसिंग चव्हाण यांनी १० लाख रुपयांची गुंतवणूक केली. अशा प्रकारे केवळ चार जणांची मिळून ३९ लाखांची फसवणूक झाल्याचे समोर आले आहे.

प्रतिनिधी

वेगवान बातमी, अचूक आणि थेट भूमिका !

कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म

©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*