दापोली तालुक्यातील हर्णे परिसरात उसन्या पैशाच्या वादातून एका व्यापाऱ्याला शिवीगाळ करून काठीने मारहाण केल्याची धक्कादायक घटना उघडकीस आली आहे. ही घटना शनिवार, १८ ऑक्टोबर २०२५ रोजी सायंकाळी साडेसातच्या सुमारास पाजपंढरी येथे घडली. दापोली पोलिसांनी या प्रकरणी आरोपी भरत चुनेकर (पूर्ण नाव माहीत नाही, रा. पाजपंढरी, ता. दापोली) याच्याविरुद्ध भारतीय न्याय संहिता अधिनियम २०२३ नुसार गुन्हा दाखल केला आहे.
या प्रकरणी दिपक अशोक खेडेकर (वय ५० वर्षे, व्यवसाय व्यापारी, रा. हर्णे, जुनी ब्राम्हणआळी, ता. दापोली) यांनी दापोली पोलीस ठाण्यात फिर्याद दाखल केली आहे.
फिर्यादी दिपक खेडेकर यांनी काही काळापूर्वी आरोपी भरत चुनेकर याला काही रक्कम उसने दिली होती. ती रक्कम परत मागण्यासाठी ते १८ ऑक्टोबर रोजी संध्याकाळी सातच्या सुमारास पाजपंढरी येथील आरोपीच्या घरी गेले.
तेथे झालेल्या चर्चेदरम्यान आरोपीने पैशाची मागणी केल्याचा राग मनात धरला आणि संतापाच्या भरात शिवीगाळ करण्यास सुरुवात केली. “भडव्या, येथून चालू पड” अशा अश्लील शब्दांत आरोपीने खेडेकर यांना दमदाटी केली. एवढ्यावरच तो थांबला नाही; तर घरातून काठी उचलून खेडेकर यांच्यावर हल्ला चढवला.
या हल्ल्यात फिर्यादीच्या उजव्या हाताच्या मनगटावर आणि डाव्या मांडीवर जखमा झाल्या. घटनेनंतर जखमी खेडेकर यांनी तत्काळ दापोली पोलीस ठाण्यात धाव घेतली आणि रात्री १२:५६ वाजता तक्रार नोंदवली.
दापोली पोलिसांनी फिर्यादीच्या तक्रारीवरून गु.र. क्र. १९०/२०२५ अन्वये भारतीय न्याय संहिता अधिनियम २०२३ चे कलम ११८(१), ३५२ आणि ३५१(२) प्रमाणे आरोपी भरत चुनेकर याच्याविरुद्ध गुन्हा नोंदवला आहे.
या प्रकरणाचा पुढील तपास दापोली पोलीस ठाण्याचे सहाय्यक पोलीस निरीक्षक यांच्या मार्गदर्शनाखाली सुरू आहे. पोलिसांनी आरोपीचा शोध सुरू केला असून, लवकरच त्याला ताब्यात घेतले जाण्याची शक्यता वर्तवली जात आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
