लांजा शहरातील सुतारवाडी आगरगाव येथे शुक्रवारी दुपारी घडलेल्या एका दुर्दैवी अपघातात ६७ वर्षीय महिलेचा मृत्यू झाला. वनिता वसंत पांचाळ असे मृत महिलेचे नाव असून, या घटनेमुळे परिसरात हळहळ व्यक्त होत आहे.
मिळालेल्या माहितीनुसार, वनिता पांचाळ यांच्या घराचे बांधकाम सुरू होते. शेजारी पूजा असल्यामुळे शुक्रवारी बांधकामाचे काम बंद ठेवण्यात आले होते. दुपारी सुमारे ३.१५ वाजण्याच्या सुमारास त्या आपल्या घरातील एका खोलीत विश्रांती घेत होत्या. याच वेळी माळ्यावर ठेवलेली लाकडी फळी अचानक तुटली आणि त्यावर ठेवलेले जड चिरे खाली कोसळले. हे चिरे थेट त्यांच्या डोक्यावर पडल्याने त्या गंभीर जखमी झाल्या.
चिरे कोसळल्याचा मोठा आवाज ऐकून शेजाऱ्यांनी तात्काळ घटनास्थळी धाव घेतली. त्यांनी वनिता पांचाळ यांना गंभीर अवस्थेत बाहेर काढून त्वरित लांजा ग्रामीण रुग्णालयात दाखल केले. मात्र, डॉक्टरांनी तपासणी केल्यानंतर उपचारापूर्वीच त्यांचा मृत्यू झाल्याचे घोषित केले.
या घटनेची माहिती मिळताच लांजा पोलीस ठाण्याचे पोलीस निरीक्षक निळकंठ बगळे यांनी तातडीने घटनास्थळी भेट देऊन पाहणी केली. अपघाताचे नेमके कारण आणि परिस्थिती जाणून घेण्यासाठी पोलीस तपास करत आहेत.
दरम्यान, अचानक घडलेल्या या अपघातामुळे परिसरात शोककळा पसरली असून, बांधकामाच्या ठिकाणी सुरक्षेच्या उपाययोजनांचे महत्त्व पुन्हा एकदा अधोरेखित झाले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
