बनावट नोटा छपाईचे कनेक्शन रत्नागिरीत असल्याचा धक्कादायक प्रकार उघडकीस आला आहे. येथील प्रसाद राणे यांच्या प्रिंटिंग प्रेसमधूनच बनावट नोटांची छपाई सुरू होती, अशी माहिती पोलीस तपासात पुढे आली आहे.
याप्रकरणी या प्रिंटिंग प्रेसचा मालक संशयीत आरोपी प्रसाद राणे याच्या मुसक्या गुन्हे शाखेने आवळल्या आहेत. याआधीच मुंबई पोलीसांनी या प्रकरणात चिपळूण आणि खेडमधील एकूण 5 जणांना अटक केली होती.
मात्र हे आरोपी मुळचे चिपळूण आणि खेडचे असले तरी त्यांनी मुंबईत राहूनच बनावट नोटांबाबत काम केल्याचे बोलले जाते. या 5 जनांना जेव्हा अटक झाली तेव्हापासून बनावट नोटा चलनात आणणार्‍या टोळीची पाळे मुळे रत्नागिरी जिल्ह्यातही पसरली असावीत असा संशय व्यक्त होतं होता.
आता रत्नागिरीतच बनावट नोटांचा छापखाना असल्याचे पोलीस तपासात पुढे आल्याने हा कयास खरा ठरला आहे. दरम्यान या प्रकरणात चिपळुणातील एका वित्तिय संस्थेच्या शाखा व्यवस्थापकाचा हात असावा असा पोलीसांचा कयास असून त्यादृष्टीने गुन्हे शाखा तपास करत आहेत. संबधीत आरोपीलाही अटक करण्यात आली आहे.
बनावट नोटांची छपाई करून चलनात आणणार्‍या या रॅकेटचा पर्दाफाश झाला. मानखुर्द पोलीसांनी स्थानिक पोलीसांच्या मदतीने गेल्या महिन्यात चिपळूणातून चौघांना अटक केली होती. या प्रकरणात गुन्हे शाखेने यापूर्वी शहानवाज शिरलकर (50), राजेंद्र खेतले (43), संदीप निवलकर (40) आणि ऋषिकेश निवलकर (26) यांना अटक केली होती. यांच्या चौकशीतून आणखी एक संशयीत अमित कासार याचे नाव पुढे आले. चौकशीतून एका वकिलाचेही नाव पुढे आले होते.
मुंबईतील मानखुर्द पोलीसांनी हे प्रकरण उघडकीस आणले. त्याप्रकरणात गेल्या महिन्यात चिपळूणात छापा टाकत संशयीत आरोपींना अटक करण्यात आली होती. त्यामुळे सार्‍या जिल्ह्यात खळबळ उडाली.
चिपळूण आणि खेडमधील संशयीत आरोपींना अटक केल्यानंतर या तपासाला अधिक गती मिळाली आणि पोलीसांच्या तपासात या बनावट नोटा छापणारा कारखाना रत्नागिरीत असल्याचे पुढे आले. त्यानुसार पोलीसांनी तपासाला अधिक वेग दिला.
रत्नागिरी एमआयडीसीमध्ये प्रिंटिंग प्रेस असणार्‍या प्रसाद राणे या संशयीत आरोपीला बनावट नोटांची छपाई करत असल्याच्या आरोपाखाली अटक करण्यात आली आहे. स्थानिक पोलीसांनी या वृत्ताला पत्रकारांशी बोलताना दुजोरा दिला आहे. संशयीत आरोपी म्हणून प्रसाद राणेला रत्नागिरीतून अटक केली.
रत्नागिरीमध्ये राणेची प्रिंटिंग प्रेस आहे. तेथूनच तो बनावट नोटांची छपाई करत असल्याची धक्कादायक माहिती तपासात समोर आल्यामुळे ही अटक करण्यात आल्याचे पोलीसांनी पत्रकारांना माहिती देताना सांगितले. गुन्हे शाखेच्या कक्ष 10 ने बनावट नोटांप्रकरणी अटकसत्र सुरू केल्यानंतर त्याने प्रिंटिंग मशीन घरापासून काही अंतरावर असलेल्या झाडाझुडपात फेकून दिली.
गुन्हे शाखेने ही मशीन जप्त केली आहे. हुबेहूब वाटणार्‍या नोटा मशीन तपासणार्‍या मशीनमध्येसुद्धा ओळखल्या जात नव्हत्या. त्यामुळे आरोपींनी आतापर्यंत अनेक नोटा विविध बाजारात चलनात आणल्या असाव्यात असा कयास आहे. 25 हजारांच्या बनावट नोटांवर 10 ते 15 हजारांचे कमिशन देत या नोटा चलनात आणल्या जात होत्या असे कळते.
यामध्ये एका वित्तीय संस्थेच्या शाखा व्यवस्थापकाला अटक करण्यात आली असून त्याची रवानगी न्यायालयीन कोठडीत करण्यात आली होती. या आरोपीने वित्तीय संस्थेच्या माध्यमातून काही उलाढाल संशयीत आरोपी राणेच्या माध्यमातून केली आहे का याचा शोध पोलीस घेत आहेत. संशयीत आरोपी प्रसाद राणेला 5 तारखेपर्यंत पोलिस कोठडी सुनावली आहे.
गुन्हे शाखेच्या कक्ष 10 चे प्रभारी वरिष्ठ पोलिस निरीक्षक दीपक सावंत, पोलिस निरीक्षक मनोज सुतार यांच्या मार्गदर्शनाखाली तपास अधिकारी गणेश तोडकर, धनराज चौधरी, पोलिस अंमलदार चिकणे आणि डफळे यांनी ही कारवाई केली आहे.
गुन्हा दाखल झाल्यापासून चिपळूण, रत्नागिरी आणि आसपासच्या परिसरात सतत पूर परिस्थिती असतानाही मुंबई-रत्नागिरी-चिपळूण असा वारंवार प्रवास करून गुन्हे शाखेने आरोपींचा शोध घेत बेड्या ठोकल्या आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta Live, Media Network
Rg.No.MH-28-0047569
Ratnagiri, Dapoli
Editor – Tejas Borghare
*वेगवान बातमी, अचूक आणि थेट भूमिका !*
