रत्नागिरी जिल्ह्यातील पाणी पुरवठा योजनांची कामे वेळेत पूर्ण व्हावीत यासाठी जाणीवपूर्वक काम टाळणाऱ्या ठेकेदारांवर कठोर कारवाई करण्याचा इशारा देत त्यांना काळ्या यादीत टाकण्याच्या सूचना पालकमंत्री Uday Samant यांनी दिल्या. अत्यावश्यक बाब असलेल्या पाणी पुरवठा योजनांना प्राधान्य देऊन त्या लवकरात लवकर मार्गी लावाव्यात, असेही त्यांनी अधिकाऱ्यांना सांगितले.
जिल्हाधिकारी कार्यालयातील सभागृहात Jal Jeevan Mission तसेच जयगड, शिरगाव आणि राजापूर प्रादेशिक पाणी पुरवठा योजनांच्या कामांचा आढावा घेण्यासाठी बैठक आयोजित करण्यात आली होती.
या बैठकीला आमदार किरण सामंत, जिल्हाधिकारी मनुज जिंदल, सहाय्यक जिल्हाधिकारी डॉ. जास्मीन, निवासी उपजिल्हाधिकारी चंद्रकांत सूर्यवंशी, प्रांताधिकारी जीवन देसाई आणि कार्यकारी अभियंता मयुरी पाटील यांच्यासह संबंधित विभागांचे अधिकारी उपस्थित होते.
बैठकीदरम्यान महाराष्ट्र जीवन प्राधिकरणचे अधिकारी श्री. सुर्वे यांनी विविध योजनांबाबत संगणकीय सादरीकरण केले. त्यानंतर पालकमंत्री डॉ. सामंत यांनी योजनांच्या प्रगतीचा सविस्तर आढावा घेतला. त्यांनी सांगितले की, ज्या ठिकाणी पाणी पुरवठा योजनांसाठी जागेच्या संदर्भात अडचणी निर्माण होत असतील, त्या ठिकाणी ग्रामस्थांशी संवाद साधून प्रश्न सोडवावेत. स्थानिक प्रशासन, प्रांत अधिकारी आणि ग्रामस्थ यांना सोबत घेऊन तोडगा काढावा.
ग्रामस्थांच्या शंका-समस्यांचे समाधान करून कामे पुढे नेणे आवश्यक असल्याचे त्यांनी स्पष्ट केले.
काही ठिकाणी जाणीवपूर्वक अडथळे निर्माण केले जात असल्याचे निदर्शनास आल्यास अशा प्रकरणांमध्ये कठोर निर्णय घेण्याचे निर्देशही त्यांनी दिले. आवश्यक असल्यास पोलिसांची मदत घेऊन कारवाई करावी, असेही त्यांनी अधिकाऱ्यांना सांगितले. कामात टाळाटाळ करणाऱ्या किंवा काम पूर्ण करण्याबाबत गांभीर्य न दाखवणाऱ्या ठेकेदारांवर कारवाई करून त्यांना काळ्या यादीत टाकण्याचे निर्देश त्यांनी दिले.
यावेळी जिल्ह्यातील रखडलेल्या विकासकामांवर लक्ष ठेवण्यासाठी “गार्डियन मिनिस्टर वॉर रूम” स्थापन करण्यात येणार असल्याची माहितीही पालकमंत्री डॉ. सामंत यांनी दिली. या वॉर रूमच्या माध्यमातून दर पंधरा दिवसांनी विविध विकासात्मक प्रकल्पांचा आणि कामांचा आढावा घेतला जाईल. संबंधित अधिकाऱ्यांची जबाबदारी निश्चित करून रखडलेली कामे वेळेत पूर्ण करण्यासाठी या यंत्रणेचा उपयोग होणार असल्याचे त्यांनी सांगितले.
बैठकीत ग्रामीण पाणी पुरवठा योजना, Jal Jeevan Mission अंतर्गत सुरू असलेल्या कामांचा तसेच प्रादेशिक पाणी पुरवठा योजनांचा आढावा घेण्यात आला. याशिवाय Ganpatipule पर्यटन विकास आराखड्याअंतर्गत सुरू असलेल्या विकासकामांवरही चर्चा करण्यात आली. जिल्ह्यातील महत्त्वाच्या पायाभूत सुविधा आणि पाणी पुरवठा प्रकल्पांची कामे गतीने पूर्ण करण्यावर बैठकीत भर देण्यात आला.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
