रत्नागिरी जिल्ह्यातील मंडणगड तालुक्यातील शिपोळे बंदर येथे व्हिडिओ शूटिंगच्या संशयावरून एका ४७ वर्षीय व्यक्तीला त्याच्याच चुलत भावासह कुटुंबीयांनी बेदम मारहाण केल्याची धक्कादायक घटना उघडकीस आली आहे. या घटनेत पीडित व्यक्ती गंभीर जखमी झाली असून, त्यांच्या पायाला भाजल्याने मोठी दुखापत झाली आहे.
मिळालेल्या माहितीनुसार, जमान सईद लांबे (वय ४७, रा. शिपोळे बंदर) हे २ एप्रिल रोजी रात्री साडे नऊ वाजताच्या सुमारास आपल्या दुचाकीवरून घरी परतत होते. ते चुलत भाऊ रशीद शरीफ लांबे यांच्या घराजवळ आले असता, नवाब लांबे याने त्यांची गाडी अडवली. “तू माझ्या गाडीचे व्हिडिओ शूटिंग केले आहेस, तुझा मोबाईल दाखव,” असा आरोप करत त्याने वाद घालण्यास सुरुवात केली.
फिर्यादीने मोबाईल देण्यास नकार दिल्यानंतर आरोपीने त्यांना शिवीगाळ करत मारहाण सुरू केली. काही वेळातच रशीद लांबे, सैफ लांबे तसेच जेसीबी ऑपरेटर घटनास्थळी दाखल झाले आणि त्यांनी मिळून फिर्यादीला पकडून ठेवले.
सायलेंसरला पाय दाबल्याने गंभीर भाजले
या मारहाणी दरम्यान रशीद लांबे यांनी फिर्यादीचा डावा पाय जबरदस्तीने दुचाकीच्या गरम सायलेंसरवर दाबून धरला. त्यामुळे त्यांच्या पायाच्या पोटरीला गंभीर भाजले गेले आणि मोठी जखम झाली. या प्रकारामुळे परिसरात संताप व्यक्त होत आहे.
या गोंधळात आरोपींनी फिर्यादीचा महागडा सॅमसंग कंपनीचा मोबाईल हिसकावून रस्त्यावर आपटून फोडला. तसेच त्यांच्या खिशातील सुमारे ११,३०० रुपये रोकड आणि गळ्यातील सोन्याची एकसरी हरवली असल्याची तक्रार आहे. दरम्यान, रेश्मा लांबे यांनीही घटनास्थळी येऊन फिर्यादीला शिवीगाळ करत त्यांचा शर्ट ओढल्याचे सांगण्यात आले आहे.
या प्रकरणी बाणकोट पोलीस ठाण्यात रशीद शरीफ लांबे यांच्यासह त्यांच्या कुटुंबातील पाच जणांविरुद्ध बेकायदेशीर जमाव जमवून मारहाण, दुखापत करणे आणि इतर संबंधित कलमान्वये भारतीय न्याय संहितेनुसार गुन्हा दाखल करण्यात आला आहे.
पोलिसांकडून या प्रकरणाचा पुढील तपास सुरू असून, आरोपींविरुद्ध कठोर कारवाई केली जाणार असल्याचे सांगण्यात येत आहे.
या घटनेमुळे किरकोळ संशय आणि वादातून गंभीर हिंसाचार घडत असल्याची बाब पुन्हा एकदा समोर आली आहे. अशा प्रकारांमुळे सामाजिक सलोखा बिघडत असून, कायद्याची भीती कमी होत असल्याची चर्चा स्थानिक स्तरावर सुरू आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
