चिपळूण शहरात शासकीय दराने वाळू उत्खनन आणि वितरण सुरू असताना दोन ठिकाणी कारवाई करण्यात आली आहे. शुक्रवारी कालुस्ते बुद्रुक व गोवळकोट येथे महसूल विभागाने धडक कारवाई केली.
यामध्ये तीन डंपर व साडेचार ब्रास वाळू जप्त केली आहे. रात्री उशिरापर्यंत दंडात्मक कारवाईची प्रक्रिया सुरू होती.
दाभोळ खाडीत मोठ्या प्रमाणात अनधिकृतपणे वाळू उपसा गेल्या काही दिवसांपासून सुरू आहे.
करंबवणेसह खेड हद्दीतील बहिरवली परिसरात सक्शन पंपाने उच्छाद मांडला आहे. गेल्या पंधरा दिवसांपासून शासकीय वाळूचे दर वाढल्यानंतर ग्राहकांनी ही वाळू खरेदी करण्याकडे पाठ फिरवत अनधिकृतपणे उपसा होणाऱ्या वाळूकडे मोर्चा वळवला आहे.
शासकीय वाळूतील होत नसलेली विक्री आणि वरिष्ठ स्तरावरून करण्यात आलेली विचारणा, यानंतर शुक्रवारी (ता. १) महसूल आणि जिल्हा खनिकर्म या दोन्ही विभागांची पथके खाडीमध्ये कारवाईसाठी उतरली. या वेळी काही सक्शन पंपही आढळले, मात्र ते बंद होते. तर तीन डंपर अनधिकृत वाळू वाहतूक करताना आढळून आले.
ते जप्त करण्यात आले आहेत. हे डंपर कालुस्ते येथील अन्वर शरफुद्दीन जबले आणि गोवळकोट येथील आरिफ हजवानी यांच्या मालकीचे आहेत. दरम्यान, ही कारवाई आणि त्याबाबतची प्रक्रिया रात्री उशिरापर्यंत सुरू होती. त्यामुळे कारवाईचा संपूर्ण तपशील उपलब्ध झालेला नाही. मात्र झालेल्या कारवाईला तहसीलदार प्रवीण लोकरे यांनी दुजोरा दिला आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
