खेड तालुक्यातील रामजीवाडी, खोपी परिसरात गुरुवारी (२७ नोव्हेंबर २०२५) दुपारी घडलेल्या एका हृदयद्रावक दुर्घटनेत बाबाराम मालसिंग ढेंबे (वय ३६) या तरुणाचा धरणात बुडून मृत्यू झाला. या अचानक घडलेल्या घटनेमुळे परिसरात शोककळा पसरली आहे.
स्थानिकांच्या माहितीनुसार, बाबाराम ढेंबे हे दररोजप्रमाणे आपल्या म्हशींना पाणी पाजण्यासाठी पिंपळवाडी लपा योजना (धरण) परिसरात गेले होते. दुपारी १२.१५ च्या सुमारास त्यांनी म्हशींना पाणी पाजण्यासाठी धरणात उतरल्यावर अनपेक्षितरीत्या त्यांचे पाय चिखलात घट्ट अडकले. चिखलाचा मुरूम आणि पाण्याचा दाब यामुळे ते स्वतःला बाहेर खेचू शकले नाहीत.
सुरुवातीला परिस्थिती सामान्य वाटत असली, तरी काही क्षणातच बाबाराम यांचा तोल गेला आणि ते पाण्यात ओढले गेले. हात-पाय हलवून त्यांनी स्वतःला वाचवण्याचा प्रयत्न केला, परंतु चिखलाचा घट्टपणा आणि पाण्याची खोली यामुळे ते सुटू शकले नाहीत. काही मिनिटांतच ते पाण्यात बुडाले.
या घटनेची माहिती परिसरातील ग्रामस्थांना मिळताच त्यांनी तातडीने धरणाकडे धाव घेतली. अनेकांनी मिळून जीव तोडून प्रयत्न केले आणि जवळपास दोन तासांच्या शोधानंतर, म्हणजे दुपारी सुमारे २.३० वाजता, ढेंबे यांना पाण्याबाहेर काढण्यात यश आले. मात्र, तोपर्यंत त्यांचा मृत्यू झाला होता.
घटनेनंतर खेड पोलीस ठाण्यात याची नोंद २७ नोव्हेंबर रोजी संध्याकाळी ७.२९ वाजता ‘आकस्मित मृत्यू’ म्हणून करण्यात आली असून पोलिसांकडून पुढील तपास सुरू आहे. बाबाराम ढेंबे यांच्या निधनाने रामजीवाडी तसेच खोपी परिसरात शोककळा पसरली असून ग्रामस्थांनी कुटुंबीयांवर सांत्वन व्यक्त केले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
