रत्नागिरी जिल्ह्यातील गुहागर तालुक्यात एक अत्यंत धक्कादायक आणि दुर्दैवी घटना उघडकीस आली आहे. कुडली माटलवाडी येथील ३७ वर्षीय संदीप बबन माटल यांचा मृतदेह तब्बल एका महिन्यानंतर जंगलात आढळून आला. या घटनेमुळे संपूर्ण परिसरात शोककळा पसरली असून नागरिकांमध्ये हळहळ व्यक्त केली जात आहे.
मिळालेल्या माहितीनुसार, संदीप माटल हे दि. ४ मार्च २०२६ रोजी सकाळी सुमारे १० वाजण्याच्या सुमारास आपल्या राहत्या घरातून बाहेर पडले होते. त्यानंतर ते परत न आल्याने कुटुंबीयांनी सर्वत्र शोधाशोध सुरू केली. नातेवाईक, मित्रपरिवार आणि स्थानिकांच्या मदतीने त्यांचा शोध घेण्याचा प्रयत्न झाला, मात्र त्यांचा काहीही ठावठिकाणा लागला नव्हता.
दरम्यान, १ एप्रिल २०२६ रोजी दुपारी सुमारे २:३० वाजण्याच्या सुमारास मौजे असोरे आवरे येथील माळरानाजवळील झाडीझुडपांनी वेढलेल्या जंगलमय भागात एक मृतदेह आढळून आला. स्थानिकांनी याची माहिती तात्काळ गुहागर पोलिसांना दिली. पोलिसांनी घटनास्थळी धाव घेत मृतदेह ताब्यात घेतला. ओळख पटविल्यानंतर हा मृतदेह बेपत्ता असलेल्या संदीप माटल यांचाच असल्याचे स्पष्ट झाले.
या घटनेनंतर परिसरात एकच खळबळ उडाली असून कुटुंबीयांवर दुःखाचा डोंगर कोसळला आहे. गावात शोकाकुल वातावरण निर्माण झाले आहे.
या प्रकरणी गुहागर पोलीस ठाण्यात १ एप्रिल २०२६ रोजी रात्री ७:५५ वाजता “आकस्मिक मृत्यू” (AD) म्हणून नोंद करण्यात आली आहे. संबंधित प्रकरण बी.एन.एस.एस कलम १९४ नुसार नोंदविण्यात आले असून मृत्यूचे नेमके कारण अद्याप स्पष्ट झालेले नाही.
पोलीस पुढील तपास करत असून, मृतदेह शवविच्छेदनासाठी पाठविण्यात आला आहे. शवविच्छेदन अहवालानंतर मृत्यूमागील कारण स्पष्ट होण्याची शक्यता आहे. तसेच, हा अपघाती मृत्यू आहे, आत्महत्या की इतर काही कारण आहे याबाबतही पोलीस सर्व अंगांनी तपास करत आहेत.
दरम्यान, स्थानिक नागरिकांनी अशा दुर्दैवी घटनांबाबत अधिक सतर्कता बाळगण्याची गरज व्यक्त केली आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
