दापोली तालुक्यातील वाकवली (गवळवाडी) परिसरात विहिरीत पडून एका महिलेचा मृत्यू झाल्याची दुर्दैवी घटना उघडकीस आली असून या घटनेमुळे परिसरात हळहळ व्यक्त केली जात आहे. ही घटना २५ मार्च रोजी सकाळी उघडकीस आली.
नीता विनायक खेडेकर (वय ३९, रा. सुशेरी, ता. खेड) असे मृत महिलेचे नाव आहे. त्या मागील सुमारे १२ वर्षांपासून मानसिक आजाराने त्रस्त होत्या आणि त्यांच्यावर वैद्यकीय उपचार सुरू असल्याची माहिती पोलिसांकडून देण्यात आली आहे.
मिळालेल्या माहितीनुसार, २४ मार्च रोजी सायंकाळी सुमारे ४ वाजण्याच्या सुमारास नीता खेडेकर या आपल्या घरातून बाहेर पडल्या होत्या. मात्र, रात्री उशिरापर्यंत त्या घरी परतल्या नाहीत. त्यामुळे कुटुंबीयांनी त्यांचा शोध घेतला; मात्र त्या सापडल्या नाहीत. अखेर खेड पोलीस ठाण्यात त्यांची बेपत्ता म्हणून नोंद करण्यात आली.
दरम्यान, २५ मार्च रोजी सकाळी सुमारे ९.३० वाजण्याच्या सुमारास वाकवली (गवळवाडी) येथील सुनील लक्ष्मण बिर्रवटकर यांच्या मालकीच्या विहिरीमध्ये एका महिलेचा मृतदेह आढळल्याची माहिती स्थानिकांनी पोलिसांना दिली. माहिती मिळताच दापोली पोलीस तात्काळ घटनास्थळी दाखल झाले. पंचनामा करून मृतदेह बाहेर काढण्यात आला.
ओळख पटविल्यानंतर हा मृतदेह बेपत्ता असलेल्या नीता खेडेकर यांचाच असल्याचे स्पष्ट झाले. या घटनेमुळे परिसरात एकच खळबळ उडाली असून नागरिकांनी हळहळ व्यक्त केली आहे.
या प्रकरणी दापोली पोलीस ठाण्यात आकस्मिक मृत्यूची नोंद करण्यात आली असून, मृत्यूचे नेमके कारण समजून घेण्यासाठी पुढील तपास सुरू आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
