दापोली तालुक्यातील वणौशी तर्फे नातू देवूळवाडी येथे जमिनीच्या जुन्या वादाने पुन्हा उग्र रूप धारण करत दोन गटांमध्ये जोरदार हाणामारी झाल्याची घटना ३ एप्रिल रोजी सकाळी उघडकीस आली. या घटनेमुळे परिसरात तणावाचे वातावरण निर्माण झाले असून, दोन्ही बाजूंनी दिलेल्या तक्रारींवरून दापोली पोलिसांनी परस्परविरोधी गुन्हे नोंदवले आहेत.
जुनी जमीन आणि बांधकामाचा प्रश्न
स्थानिक पातळीवर सुरू असलेल्या जमिनीच्या वादातून हा प्रकार घडल्याचे समोर आले आहे. संबंधित जागेवर घर बांधकाम करण्याच्या मुद्द्यावरून दोन्ही गटांमध्ये पूर्वीपासून मतभेद होते. याच वादाने ३ एप्रिल रोजी प्रत्यक्ष हाणामारीचे रूप घेतले.
पहिल्या गटाची तक्रार – दगडफेक व मारहाण
पहिल्या गटातील फिर्यादी राजकुमार बाळाजी पाटणे (वय ६२) यांनी दिलेल्या तक्रारीनुसार, ते आपल्या पत्नीसह जात असताना आरोपी अंकुश दत्ताराम पाटणे यांनी त्यांच्या घराच्या बांधकामाला विरोध केल्याच्या कारणावरून वाद सुरू केला.
वाद वाढताच अंकुश यांनी शिवीगाळ करत राजकुमार यांच्या अंगावर दगड फेकून त्यांना जखमी केले. यानंतर दिनेश पाटणे यांनी त्यांच्या छातीवर बुक्क्यांनी मारहाण केली. या घटनेदरम्यान सुनंदा व सुप्रिया पाटणे यांनीही शिवीगाळ करत “जिवंत ठेवणार नाही” अशी धमकी दिल्याचे तक्रारीत नमूद आहे.
या प्रकरणी पोलिसांनी अंकुश, दिनेश, सुनंदा व सुप्रिया पाटणे यांच्याविरोधात गुन्हा दाखल केला आहे.
दुसऱ्या गटाची फिर्याद – हल्ल्याचा आरोप
दुसऱ्या बाजूने अंकुश दत्ताराम चव्हाण (पाटणे) (वय ५०, सध्या रा. विरार) यांनीही पोलिसांत तक्रार दिली आहे. त्यांच्या तक्रारीनुसार, ते त्यांच्या नवीन घराच्या बांधकामासाठी मुहूर्त पूजा करत असताना राजकुमार पाटणे व ज्योत्स्ना पाटणे यांनी तेथे येऊन वाद निर्माण केला.
“ही आमची जागा आहे, येथे घर बांधू देणार नाही,” असे म्हणत त्यांनी वाद घातल्याचा आरोप करण्यात आला आहे. यावेळी राजकुमार यांनी हातातील दगडाने अंकुश यांच्या उजव्या हाताच्या पंजावर मारून दुखापत केली. तसेच मदतीला आलेल्या दिनेशच्या पाठीत ज्योत्स्ना पाटणे यांनी दगड मारल्याचेही नमूद आहे.
तसेच त्यांच्या वृद्ध आईला ढकलाढकली करत जीवे मारण्याची धमकी दिल्याचाही गंभीर आरोप तक्रारीत करण्यात आला आहे.
दोन्ही बाजूंच्या तक्रारीनंतर दापोली पोलिसांनी भारतीय न्याय संहिता २०२३ अंतर्गत विविध कलमान्वये परस्परविरोधी गुन्हे नोंदवले आहेत. सध्या पोलिसांकडून घटनेचा सखोल तपास सुरू असून, संबंधित व्यक्तींवर पुढील कायदेशीर कारवाई केली जाणार आहे.
कौटुंबिक व जमिनीच्या वादातून झालेल्या या हिंसक घटनेमुळे नातू देवूळवाडी परिसरात खळबळ उडाली आहे. स्थानिकांमध्ये भीतीचे वातावरण निर्माण झाले असून, अशा प्रकारच्या घटना रोखण्यासाठी कठोर कारवाईची मागणी होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
