दापोली तालुक्यातील जालगाव येथील चैतन्यनगर परिसरात बंद घर फोडून चोरी करण्याचा प्रयत्न झाल्याची घटना समोर आली असून, यामुळे परिसरात भीतीचे वातावरण निर्माण झाले आहे. सेवानिवृत्त महिला अश्विनी प्रसाद दातार (वय ६०) यांच्या ‘सोनचाफा’ या निवासस्थानी हा प्रकार घडला आहे. याप्रकरणी अज्ञात चोरट्यांविरुद्ध दापोली पोलीस ठाण्यात गुन्हा दाखल करण्यात आला असून, पोलिसांनी तपासाची चक्रे फिरवली आहेत.
मिळालेल्या माहितीनुसार, २४ मार्च रोजी सकाळी सुमारे ९.४५ ते २७ मार्च रोजी सायंकाळी ५.३० या कालावधीत ही घटना घडली. संबंधित घर बंद असल्याची माहिती मिळाल्यानंतर चोरट्यांनी घराला लक्ष्य केले. त्यांनी सर्वप्रथम घराच्या सेफ्टी डोअरचे कुलूप तोडले आणि त्यानंतर मुख्य दरवाजाही जबरदस्तीने उघडून आत प्रवेश केला.
घरात शिरल्यानंतर चोरट्यांनी थेट बेडरूममध्ये जाऊन लोखंडी कपाट फोडले. कपाटातील वस्तूंची उलथापालथ करत सर्व साहित्य अस्ताव्यस्त फेकून दिले. मात्र, प्रत्यक्षात काही मौल्यवान वस्तू चोरीला गेल्या आहेत का, याबाबत अद्याप स्पष्ट माहिती मिळालेली नाही. पोलीस याबाबत सखोल तपास करत आहेत.
दरम्यान, फिर्यादी अश्विनी दातार या सध्या कामानिमित्त मुंबई येथे वास्तव्यास असल्याने त्यांचे दापोलीतील घर बंद होते. याच परिस्थितीचा फायदा घेत चोरट्यांनी नियोजनपूर्वक घरफोडीचा प्रयत्न केल्याचा प्राथमिक अंदाज व्यक्त केला जात आहे. घर काही दिवस बंद असल्याची माहिती चोरट्यांना कशी मिळाली, याचाही तपास सुरू आहे.
ही घटना ३० मार्च रोजी रात्री उशिरा उघडकीस आली असून, त्यानंतर तात्काळ दापोली पोलीस ठाण्यात तक्रार नोंदवण्यात आली. भारतीय दंड संहिता कलम ३३१ (४) नुसार अज्ञात आरोपींविरुद्ध गुन्हा दाखल करण्यात आला आहे.
घटनेनंतर दापोली पोलीसांनी घटनास्थळी पाहणी करून पंचनामा केला आहे. तसेच परिसरातील सीसीटीव्ही कॅमेऱ्यांचे फुटेज तपासण्याचे काम सुरू करण्यात आले आहे. संशयित व्यक्तींच्या हालचालींचा मागोवा घेण्यासाठी स्थानिक पातळीवर माहिती गोळा केली जात आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
