मुंबई–गोवा महामार्गावर दहशत माजवणारी घटना समोर आली आहे. संगमेश्वर तालुक्यातील तळेकांटे गणपती मंदिराजवळ एका महिलेचा पत्ता विचारण्याच्या बहाण्याने अज्ञात इसम आणि त्याच्या साथीदारांनी तब्बल एक लाख रुपयांचा सोन्याचा ऐवज लंपास केल्याची धक्कादायक घटना सोमवारी उघडकीस आली. या प्रकरणी पीडित महिला श्रीमती भारती भार्गव (वय 58, कळंबटे) यांनी संगमेश्वर पोलिसात तक्रार दाखल केली आहे.
घटनेनुसार, भार्गव या तळेकांटे गणपती मंदिराजवळून चालत असताना अचानक मुंबई–गोवा राष्ट्रीय महामार्गावरून येणारे एक चारचाकी वाहन त्यांच्या जवळ थांबले. वाहनातून उतरलेला अनोळखी युवक आणि सोबतची महिला सुरुवातीला मार्ग विचारत सभ्यपणे बोलायला लागले. पण काही क्षणांतच दृश्य पलटले—युवकाने अचानक चाकू उगारत भार्गव यांना धमकावले आणि गळ्यातील सोन्याची चेन हिसकावून दोघेही गाडीमध्ये बसत पळ काढला. सर्व काही काही सेकंदांत घडल्याने त्या क्षणात भयचकित झालेल्या भार्गव यांनी तत्काळ मदतीसाठी आरडाओरड केली, मात्र
चोरी करणारे चोरट्यांप्रमाणे क्षणार्धात गायब झाले.
तक्रार मिळताच संगमेश्वर पोलिसांनी घटनास्थळी धाव घेत पंचनामा करून गुन्हा रजिस्टर नं. 138/2025 भा. न्यू. संहिता 2023 नुसार गुन्हा दाखल केला आहे. तपास संगमेश्वर पोलिस स्टेशनचे पोलीस निरीक्षक आर. एस. गावित यांच्या मार्गदर्शनाखाली वेगाने सुरू आहे. संशयितांचा माग काढण्यासाठी पोलिसांकडून महामार्गावरील सीसीटीव्ही फुटेज, वाहनांचा तपशील आणि संभाव्य रुट्स तपासले जात आहेत. या थरारक चोरीमुळे मुंबई–गोवा महामार्गावरील प्रवाशांच्या सुरक्षेचा प्रश्न पुन्हा एकदा गंभीरपणे ऐरणीवर आला असून, नागरिकांमध्ये भीतीचे वातावरण निर्माण झाले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
